Haji
Syukron lagi bingung, die heran ame si
Rojali anaknye nyang paling tue. Dari kemaren ampe gini ari masih nduplong
aje di bawah pohon Rengas samping rumehnye, nyang deket kandang ayam.
“
Liat noh anak lu, dari kemaren ampe gini ari masih nduplong aje di samping kandang
ayam, gue takut die kene tetelo, trus mampus dah besok.”
“
Abang kalo ngomong sembarangan aje, orang lah di bilang kene tetelo.” Bininya
nyang punya nama Aminah nanggapin.
“
Abis….kerje kage, sembahyang kage, makan juge kage, udah dua ari tuh die
ngambek begitu. Kalo kite manusie, diambekin bisa berubah, kalo Allah mah, mau
semue manusia kaga sembahyang juge kage ade ruginye. Ntar juge kalo gue dah
kesel, gue pentung palenye pake pentungan Hansip.” Haji Syukron mulai naik
emosinye.
“
Lagian Abang, orang mau kawin bukannye di turutin.”
“
Mineh, gue bukannye kaga mau nuruti maunye anak. Tapi lu liat, cewek nyang
dipilihnye ntu kan Pehcun. Perempuan malem. Ape kate orang, masa anaknye Haji
Syukron nyang Kyai sekaligus Penghulu kampung punye mantu Pehcun.”
“
Bekas bang, atawa afkiran, si Juleha dah tobat jadi Pehcun, die juge dah mulai
ikut rombongan pengajian aye.” Bininye ngejelasin.
“
Nyang bener lu, tuh Juleha udeh tobat?”
“
Bener bang, Jumaat kemaren aye liat die hadir di pengajian nyang aye pimpin.”
“
Kalo begitu mah panggil dah si Rojali! Gue pengen ngomong nyang jelas ame tuh
anak.”
Pok
Aminah lalu ke luar teras nyamperin Rojali. Diajaknye masuk Rojali ke ruang
tamu. Dibikinin tuh anak teh manis, langsung aje diajak ngobrol bertige.
“
Lu beneran mau nikeh ame si Juleha? Lu emang kaga punye pilihan nyang laen?”
“
Kagak Be, pokoknye Aye harus kawin ame si Juleha, kalo kaga mendingan aye mati
aje.”
“
Jali, Emang luh udeh berapa lame berhubungan ame tuh Pehcun?
“
Udeh beh, udeh ampir satu taon, dan sekarang Die dah Tobat jadi Pehcun. Die mao
jadi perempuan baek-baek sekarang.”
“
Luh emangnye udah Nyatain perasaan lu ame die? Ape die mau ame lu? Sekarang
giliran Nyaknye nyang buka mulut.
“
Belon sih Nyak, tapi maksud Jali kite langsung lamar aje, masak sih die kaga
mau, die kan bekas perempuan begituan. Jali yakin Nyak, pasti dah Juleha mau
jadi bini Jali.”
“
Kalo emang ntuh pilihan lu, besok lu ngomong ma die, bilang ame die, Babe ame
Nyak mau dateng kerumahnye. Sekarang lu masuk kamar trus mandi. Puyeng gue
nyium bau lu.”
Rojali
girang banget. Impiannye kesampean juge. Baru aje dia mao ngangkat pantat dari
korsi, tibe-tibe Ustad Somad nyang muridnye Haji Syukron sampe di depan pintu,
bareng ame Juleha.
“
Assallamualaikum…”
“
Walaikum salam …” Rojali, Haji Syukron dan pok Aminah menjawab berbarengan. Rojali Jadi salah tingkeh.
Diliatnye Juleha hari itu cakep banget. Pake kerudung merah jambu mirip banget
ame Ide Royani.
Abis
menyuruh duduk pare tetamu, Pok Aminah lalu
ke belakang nyiapin minuman. Mate Rojali sekali- sekali ngelirik ke arah Juleha
nyang dijawab cume ame senyumnye doang.
“
Ade ape nih Mad, tumben lu sore-sore ke mari?”
“
Iye nih Abang, pake ngajak Juleha segala lagi.” Rojali ikutan ngomong, sambil
matanye terus ngelirikin Juleha.
“
Begini Pak Haji, Aye nih kan udeh lame jadi dude, Aye ade rencana mao nikeh
lagi, sekaligus aye mao kenalin calon aye. Kalo bise luse nikahnye, nyang jadi penghulunye Pak Haji
aje, Ane kan murid Pak Haji juge.”
“
Trus calon bini lu siape?”
“
Ini Pak Haji, si Juleha” Nyang ditunjuk bang Somad jadi merah mukanye. Tapi
Juleha mengangguk dengan pasti.
Ngedengaer
Somad ngomong Rojali matenye jadi gelap, tulang-tulangnye pade lemes, dia
nyungsep, mukenye nabrak teh manis bikinan Nyaknye.
“Rojali
kenape Pak Haji?”
“
Gak tau, kesambet setan puun rengas kali.”
*****
Tidak ada komentar:
Posting Komentar